Deputeti i Partisë Demokratike Xhelal Mziu u ankua në nisje të seancës së sotme plenare në Kuvend, pasi nga ana e kryeparlamentarit Niko Peleshi, i është refuzuar kërkesa për interpelancë me ministrin për Bujqësinë dhe Zhvillimin Rural, Andis Salla.
“Unë dhe një grup deputetësh kishim kërkuar prej javësh një interpelancë me ministrin e Bujqësisë dhe në mënyrë të papritur ju zoti kryetar bëni anulimin e kësaj interpelance, për shkak se në një nga pikat kërkohet të diskutohet për fondet e IPARD-it, me pretendimin se ne futemi në kompetencën e SPAK-ut. Ju me pa të drejtë, meqenëse përmenden fondet e IPARD-it thoni se bie ndesh me SPAK. Është e paimagjinueshme. Parlamenti dhe SPAK-u janë dy institucione të ndryshme.
Nëse SPAK heton individët për korrupsion, deputetët janë personat që marrin qeverinë në pyetje për problematikat e sektorit, siç është bujqësia. Është e padrejtë dhe dua të më jepet e drejta e interpelancës.”, tha Mziu.
Peleshi iu përgjigj duke thënë se pas shqyrtimit të përmbajtjes së kërkesës, është kthyer përgjigje se ajo është refuzuar, pasi nuk plotësonte kushtet ligjore për t’u pranuar. Kjo sepse çështja po hetohet nga SPAK.
“Do të cënonte parimin kushtetues të ndarjes dhe balancimit të pushteteve. Në këto rrethana kërkesa nuk mund të pranohet.”, tha Peleshi.
