Dy gra të lindura në Indi, të adoptuara nga familje të ndryshme holandeze dhe të rritura pranë njëra-tjetrës në Holandë, kanë zbuluar pas dekadash se janë motra biologjike.
Meena Geltink, 43 vjeçe, dhe Minal Tijssen, 44 vjeçe, kishin lindur në fillim të viteve 1980 në Mumbai dhe ishin adoptuar nga dy jetimore të ndryshme, vetëm disa muaj pas lindjes. Familjet adoptuese nuk kishin dijeni për lidhjen e tyre biologjike.
Të dyja u takuan për herë të parë kur ishin adoleshente, në një aktivitet të organizuar nga agjencia përmes së cilës ishin realizuar birësimet. Takimi i parë ishte i pazakontë. Shoqet e tyre vunë re menjëherë ngjashmërinë e madhe mes dy vajzave dhe u kërkuan të shikonin njëra-tjetrën në pasqyrë. Meena kujton se në atë moment vuri re hundën e njëjtë dhe mënyrën e ngjashme të të qeshurit. Ajo thotë se gjatë darkës nuk mund të ndalonte së shikuari Minalin, pasi ngjashmëria mes tyre ishte e habitshme.
Të nesërmen shkëmbyen numrat e telefonit dhe adresat. Edhe pse nuk dinin asgjë se ishin të afërta biologjikisht, ata krijuan një raport miqësor menjëherë. Për vite me radhë ato shkëmbyen letra dhe e quanin njëra-tjetrën “motër”, sepse kështu e ndjenin.
Ato flisnin për shkollën, miqtë, djemtë, daljet, sportet dhe muzikën. Madje zbuluan se kishin të njëjtin grup të preferuar, Backstreet Boys. Pas rreth 15 vitesh, megjithatë, kontakti mes tyre u ndërpre. Minal ishte zhvendosur në Francë, ndërsa Meena, e cila sapo ishte bërë nënë për herë të parë, ishte përfshirë gjithnjë e më shumë në jetën familjare.
Në vitin 2017, Meena mori pjesë në një takim të personave të adoptuar nga India dhe dëgjoi për testet e ADN-së. Ajo vendosi të kryente një test, por nuk gjeti asnjë përputhje dhe më vonë e fshiu aplikacionin nga telefoni.
Në prill të këtij viti, Minal kreu gjithashtu një test ADN-je gjatë një vizite te prindërit e saj në Holandë. Një muaj më vonë, më 20 maj, ajo i dërgoi Meenës një mesazh në Facebook: “Më mban mend?”
Minal i bashkëngjiti mesazhit një pamje të rezultateve të testit.
Meena e riinstaloi aplikacionin, por ishte aq e emocionuar dhe nervoze sa thotë se shkroi fjalëkalimin gabim disa herë përpara se të hynte në llogari. Rezultati ishte i qartë: testi tregonte se dyja gratë kishin një përputhje gjenetike të plotë, pra rezultonin motra biologjike.
“Kam qarë”, ka treguar Meena. Fakti që ato e kishin quajtur njëra-tjetrën “motër” që nga adoleshenca dukej tashmë si një intuitë që kishte rezultuar e saktë. Minal, ndërkohë, nuk e kishte kuptuar menjëherë se përputhja në test ishte vajza që kishte njohur rreth 30 vite më parë. Vetëm pasi pa fotografitë e saj në rrjetet sociale, kuptoi se bëhej fjalë për Meenën.
“Ne ishim shoqe para se të ishim motra”, tha ajo. “Ne ishim motra gjatë gjithë kohës, por nuk e dinim.”
Në gusht, të dyja gratë u takuan për herë të parë pas zbulimit të lidhjes së tyre biologjike. Takimi ishte tepër emocional, me përqafime, lot dhe të qeshura. Ato bënë edhe selfie-n e tyre të parë si motra.
Meena, e cila tashmë është nënë e tre fëmijëve, e përshkroi takimin si një “kthim në shtëpi”. Ajo tha se për vite me radhë të dyja kishin ndier një boshllëk në zemër dhe se tani ndiheshin sikur një pjesë që u kishte munguar ishte kthyer më në fund në jetën e tyre.
Minal jeton në Francë me partnerin e saj dhe dy djemtë. Meena jeton në Holandë. Të dyja tani po përpiqen të njohin më mirë historinë e përbashkët familjare dhe të zbulojnë më shumë për origjinën e tyre.
Historia e grave, e cila nis me dy foshnja të ndara në dy jetimore të ndryshme në Mumbai dhe vazhdon me dy vajza që u bënë shoqe pa e ditur se ishin të një gjaku, duket vërtet si një skenar filmi. Pas më shumë se tri dekadash, testi i ADN-së konfirmoi atë që ato kishin ndier që në takimin e parë: lidhja mes tyre kishte qenë shumë më e thellë se një miqësi.
