Kryeministri Edi Rama i është nënshtruar dy operacioneve në rreth 6 muaj, ndërsa duket se i ka besuar të njëjtit grup mjekësh, të drejtuar nga rektori i Universitetit të Mjekësisë, Arben Gjata.
BalkanWeb mëson gjithashtu pjesë e ekipit të mjekëve që kryer ndërhyrjen ditën e sotme ka qenë edhe profesor Arben Beqiri, i cili në 2017, për disa muaj drejtoi Ministrinë e Shëndetësisë, si ministër teknik në atë që u quajt si qeveria teknike, pas marrëveshjes Rama-Basha, pak përpara zgjedhjeve parlamentare. Operacioni i sotëm është asistuar edhe nga mjekët e tjerë si Krenar Lila, Dritan Rahovica, Saimir Kuçi.
E ndërsa në prill, kreu i Qeverisë iu nënshtrua operacionit për heqjen e apendicitit, ditën e sotme Rama iu nënshtrua një ndërhyrjeje kirurgjikale për hernien inguinale.
Operacioni i sotëm ka zgjatur rreth 100 minuta, ndërsa ekipi që ka bërë ndërhyrjen në të dy rastet është i përbërë nga i njëjti grup mjekësh, ndër më të njohurit në QSUT.
Stafi i mjekëve të QSUT që kanë realizuar ndërhyrjen kirurgjikale ndaj kryeministrit në të dyja rastet janë: Profesor Arben Gjata, shefi i kirurgjisë dhe rektori i Universitetit të Mjekësisë; profesor Krenar Lila, shefi i anestezi-reanimacionit; profesor Arben Beqiri, kirurg; asistent-profesor Saimir Kuçi anestezist dhe doktor Dritan Rahovica, kirurg.
Pritet që Kryeministri të lerë mjediset spitalore gjatë ditës së premte. Mjeku që kryesoi operacionin, Arben Gjata deklaroi se kryeministri është në gjendje të mirë shëndetësore pas ndërhyrjes kirurgjikale.
Ekipi i mjekëve që operoi Ramën, në të dyja ndërhyrjet kirurgjikale:
Arben Gjata, Shefi i kirurgjisë
Arben Beqiri, Kirurg
Krenar Lila, Shefi i anestezi-reanimacionit
Dritan Rahovica, Kirurg
Saimir Kuçi, Anestezist
