Një 77-vjeçar nga Australia ka ndërruar jetë pasi është sulmuar nga një kangur që e mbante në shtëpi.
Ka qenë një i afërm, i cili e ka gjetur të moshuarin me lëndime të rënda në shtëpinë e tij në Redmond të Australisë. Kur personeli mjekësor ka mbërritur në shtëpinë e 77-vjeçarit, kanguri i ka penguar që të futeshin brenda në banesë. Në vendngjarje mbërriti dhe Policia, e cila u detyrua që të qëllonte kangurin.
I moshuari ka pasur dëmtime shumë të rënda dhe pavarësisht ndihmës mjekësore, ka ndërruar jetë.
Australia është shtëpia e rreth 50 milionë kangurëve, të cilët mund të peshojnë deri në 90 kilogramë dhe të rriten deri në 2 metra të gjatë. Por sulme të tilla janë të rralla. Ky është rasti i parë fatal i raportuar në Australi që nga viti 1936.
“Kangurët kanë dhëmbë të mprehtë, kthetra dhe këmbë të fuqishme”, tha eksperti i sjelljes së kangurit Graeme Coulson për Korporatën Australiane të Transmetimeve.
Në muajin Korrik, një kangur sulmoi një 67-vjeçare gjatë një shtëtitje në Queensland të Australisë.
/a.r
