Delegacionet e Shqipërisë dhe Maqedonisë së Veriut ndodhen në Bruksel për hapjen e negociatave të anëtarësimit dhe mbajtjen e konferencës së parë ndërqeveritare me BE, pasi parlamenti i Shkupit e votoi të shtunën planin francez që zgjidh ngërçin me Bullgarinë me 68 vota.
Po ashtu, dje Ministrat e Jashtëm të Maqedonisë së Veriut dhe të Bullgarisë e nënshkruan në Sofje, protokollin e dytë midis dy vendeve fqinje përmes së cilit i mundësohet Shkupit hapja e rrugës drejt negociatave me Bashkimin Europian. Maqedonia e Veriut ka statusin e vendit kandidat prej 17 vjetësh.
Edhe Shqipëria pret prej 8-vjetësh hapjen e negociatave, të cilat janë shoqëruar me një sërë kushtëzimesh si nga disa vende të BE-së, por edhe vetë unioni, ndërsa 2 vitet e fundit mbaheshim peng nga veto bullgare.
Për këtë çështje u diskutua mbrëmjen e së hënës në Debat nga Alba Alishani, ku analisti Plator Nesturi u shpreh se nga nesër Shqipëria ndryshon trenin, por mbetet për t’u parë se me çfarë shpejtësie ai do të ecë në drejtim të Brukselit. “Për Shqipërinë ishte ajo puthja e fatit e minutës së fundit, e cila ndikoi të zgjidhej kjo situatë nëpërmjet propozimit francez. Është një arritje dhe ne kemi hipur në një tren, i cili do të na çojë në portet e Brukselit. Ajo që nuk dihet është se me çfarë shpejtësie do të jetë ky rrugëtim. Ky nuk më duket një rrugëtim i vetëm i Shqipërisë, por një bashkë me vendet e rajonit”, tha analisti.
Më tej, Nesturi theksoi se asnjë nga vendet e Ballkanit Perëndimor nuk është gati për anëtarësim. “Asnjë nga vendet e Ballkanit Perëndimor nuk është gati. Ky është një element që ne duhet ta kemi në referencë. Mangësitë që ka Shqipëria nuk janë elementë të shtuar që të shtohen në politikën brenda vendit. Ose jemi pro ose jemi kundër”, u shpreh Nesturi.
