Aksidenti në Kryqëzimin e Patokut, në autostradën Laç – Fushë Krujë ku humbi jetën 54 vjeçarja Lule Dedaj mbetet ende pa autorë.
Policia edhe pas verifikimit të kamerave të sigurisë së bizneseve në këtë rrugë nuk ka mundur të identifikojë mjetin që përplasi këmbësoren.
Katër ditë pas ngjarjes, familjarët e gruas kërkojnë drejtësi.
“Kërkoj zbardhjen e ngjarjes. Personi që e ka bërë të paktën të dalë e të kërkojë falje dhe të njihet se cfarë ka bërë,” tha Leonora Deda, motra e viktimës.
Lule Deda u gjet e vdekur mëngjesin e së premtes pranë vendit të quajtur mbikalimi i Patokut.
Dyshimet janë se ajo u përplas kur po tentonte të kalonte rrugën nga një makinë, drejtuesi i të cilës e braktisi aty dhe ende mbetet i lirë.
“Ai person të paktën me dorën në zemër, duhet të kishte ndaluar që ti jepte ndihmën e të dinte se kë ka shtyp,” tha ajo.
Kryqëzimi i Patokut, është një prej njollave te zëza të aksidenteve në autostradën Laç – Fushë Krujë.
Shpesh herë shkak i ngjarjeve fatale aty bëhen tentativat e gabuara të këmbësorëve që kalojnë autostradën mes përmes duke shmangur mbikalimin vetëm disa metra më tutje.
