Një operacion antidrogë i koduar “Transportuesi” i policisë së Gjirokastrës dhe Tepelenës, ka vënë në pranga një efektiv policie dhe një qytetar, duke transportuar bimë narkotike me furgon.
Mbi bazën e informacioneve të siguruara në rrugë operative, uniformat blu organizuan operacionin si rezultat i të cilit u arrestuan në flagrancë A. K., 23 vjeç, punonjës policie, dhe K. H., 16 vjeç, banues në Vlorë.
Si pasojë e trysnisë së kontrollit të imtësishëm të territorit nga shërbimet e policisë, duke përdorur dronë dhe helikopterë, të dyshuarit në këtë veprimtari kriminale i kanë prerë bimët narkotike para kohe.
Shërbimet e policisë, bazuar dhe në informacionet e marra në rrugë operative, kanë organizuar punën dhe në aksin rrugor Dukaj-Salari kanë konstatuar mjetin furgon me drejtues shtetasin A. K., dhe pasagjer të miturin K. H., duke transportuar bimët narkotike.
Në cilësinë e provës materiale janë sekuestruar mjeti furgon, bimët narkotike, arma e shërbimit të punonjësit të policisë dhe 3 aparate celular.
Në bashkëpunim me Prokurorinë dhe Shërbimin për Çështjet e Brendshme dhe Ankesat në vijon puna për identifikimin dhe kapjen e personave të tjerë të përfshirë në këtë veprimtari kriminale.
/a.r
