Edhe pse sot e konsideruan si “skenar të mafjas”, Partia Demokratike ka patur dijeni të plotë që dy vite më parë lidhur me mbetjet e qytetit të Durrësit.
Referuar një vendimi të Këshillit Bashkiak të këtij qyteti të marrë më 20.07.2018, PD ishte në dijeni se këto mbetje do të duhet të sistemoheshin në një landfill, e konkretisht në atë të Sharrës për shkak të tejkalimit të kapaciteteve.
Gazeta “TemA” ka publikuar dokumentin kur Këshilli Bashkiak ka shpallur emergjencë mjedisore për të menaxhuar mbetjet urbane si dhe kanë votuar për zgjidhjen alternative të kësaj situate duke i sjellë në Tiranë.
Me firmën e Alban Ramohitajt, kryetar Këshilli, bashkia e Durrësit kërkonte asokohe gjetjen e një hapësire të re për depozitimin e mbetjeve, e po ashtu edhe një bashkëpunim me koncesionarin e Landfillit të Tiranës.
Pavarësisht kësaj, dakortësimit dhe votës pro në Këshillin Bashkiak, ditën e sotme Partia Demokratike ka ndryshuar qëndrim.
Nënkryetari i kësaj force politike, Edi Paloka akuzoi qeverinë se po i jep para tepër koncesionarit në Sharrë.
“Mbushja e Durrësit me plehra dhe djegia e tyre masive në Manzë ishte një shfaqje e inskenuar e mafias së plehrave. Ajo është një shfaqje kriminale e Edi Ramës dhe e Erion Veliajt për të çuar 100 milionë euro në inceneratorin e tyre në Sharrë.
Mafia e plehrave, me në krye Edi Ramën, kishte llogaritur me saktësi skenarin për të çuar 100 milionë euro para publike në xhepat e Edi Ramës, Erion Veliajt, Arben Ahmetajt dhe Taulant Ballës.
Në inceneratorin e Tiranës, mafia e plehrave është fshehur pas një kompanie fantazëm, e regjistruar në parajsë fiskale.
Me këmbënguljen e Edi Ramës, shteti shqiptar do t’i kalojë 100 milionë euro për plehrat e Durrësit”, pretendoi Paloka.(TemA)
/e.rr
