Policia e Kamzës ka zbuluar një lokal të përshtatur për ushtrimin e veprimtarisë së paligjshme të lojërave të fatit.
Uniformat blu bëjnë me dije se është proceduar penalisht 1 shtetas që u kap në flagrancë në local. Ndërkohë që vijon puna për kapjen e pronarit të lokalit.
Gjatë aksionit u sekuestruan 2 makineta për lojëra fati dhe 1 aparat celular.
Materialet procedurale i kaluan Prokurorisë, për veprime të mëtejshme.
“Strukturat e Komisariatit të Policisë Nr. 5, në vijim të punës për goditjen e paligjshmërive në fushën e lojërave të fatit, bazuar në informacionet e marra në rrugë operative, kanë organizuar kontrolle në lokale dhe ambiente të ndryshme, të cilat mund të vihen në dispozicion për organizimin e lotarive të palejuara dhe si rezultat kanë goditur 1 rast të kësaj veprimtarie.
Gjatë kontrolleve të ushtruara nga shërbimet e Policisë, në rrugën “Azem Hajdari”, në lokalin e shtetasit G. S., 37 vjeç, të cilin e kishte vënë në dispozicion për organizimin e lotarive të palejuara, u gjetën dhe u sekuestruan 2 makineta për lojëra fati. Gjithashtu, gjatë kontrollit të aparatit celular të një 17-vjeçari, klient në lokal, u gjetën faqe që shërbejnë për vënien e basteve sportive.
Në vijim të veprimeve nisi procedimi në gjendje të lirë për 17-vjeçarin, ndërkohë që po punohet për kapjen e shtetasit G. S”, thuhet në njoftimin e policisë.
/a.r
