Presidenti i Federatës Botërore të Futbollit Sepp Blatter ka dhënë dorëheqjen nga drejtimi i FIFA-s, vetëm pak ditë pas rizgjedhjes së tij për të 5 herë në këtë post.
Vendimi është bërë i ditur nga vetë Blatter në mbledhjen e FIFA-s në Zyrih ku ai deklaroi se nuk do të jetë më Presidenti i organit më të lartë futbollistik.
Ky vendim ka ardhur në një kohë kur FIFA është përfshirë nga skandalet e korrupsionit, ku në pranga janë vënë edhe disa zyrtarë të lartë të këtij organi.
“Me sa duket jo të gjithë e mbështetën zgjedhjen time në krye të FIFA-s. Për këtë arsye unë nuk do të jem më President. Brenda pak ditësh do të bëhet një mbledhje e jashtëzakonshme e FIFA-s për të përcaktuar pasardhësin tim. Dua të theksoj se unë do të angazhohem thellësisht për reformat që organi më i lartë botëror i futbollit duhet të ndërmarrë.” u shpreh Blatter
Ai u zgjodh para pak ditësh për të pestën herë President i FIFA-s, ku u desh raundi i dyte për përcaktuar fituesin mes Blatter dhe Princit Ali. Por në raundin e dytë, pak para nisjes së votimit, Princi Ali u tërhoq.
