E dini ku ndodhet ‘Porta e Ferrit’? Shikojeni… (VIDEO)
Në Turkmenistan ndodhet një krater që digjet prej 44 vitesh dhe që natën ndriçon zonën përreth. Ai ndodhet në një vend të shkretë, por që është kthyer destinacion turistik për shumë persona. ‘Porta e Ferrit’, u pagëzua me këtë emër nga banorët e zonës dhe ndodhet pranë fshatit Derveze, në shkretëtirën veri-perëndimore të vendit. Gjithçka nisi në vitin 1971, kur kërkues të ish-Bashkimit Sovjetik nisën kërkimet për gaz dhe naftë. Dhe ata kishin të drejtë. Nëntoka në këtë rajon të Turkmenistanit fsheh sasi të mëdha gazi. Por gjatë gërmimeve, toka u shemb duke formuar një gropë mbi 20 metër të thellë dhe me diametër prej 70 metrash. Nga ky incident nisi të çlirohej gaz metan, tepër helmues për njeriun, në mënyrë të pakontrolluar në sipërfaqe. Rusët menduan si zgjidhje ndezjen dhe djegien e sasisë së gazit që çlirohej për të shmangur helmimin e banorëve lokalë. Por gjërat nuk shkuan ashtu siç ishte parashikuar; edhe sot e kësaj dite, nga një distancë prej 44 vitesh, flakët vazhdojnë që të digjen, duke përhapur një erë të fortë të squfurit.
