Zgjedhjet presidenciale te Real Madridi po krijojnë tension rreth të ardhmes së Jose Mourinho-s dhe planeve të klubit madrilen për sezonet e ardhshme. Sipas mediave spanjolle, konfirmimi i procesit zgjedhor ka ndërlikuar një marrëveshje të mundshme mes Real Madridit dhe trajnerit portugez. Në këtë situatë, edhe Benfica po përpiqet të përfitojë financiarisht, duke synuar të marrë më shumë se klauzola e lirimit prej 7 milionë eurosh që është e vlefshme deri më 26 maj. Pas kësaj date, klauzola nuk do të jetë më aktive dhe çdo transferim do të kërkojë negociata të drejtpërdrejta mes klubeve.
Raportet mes Real Madridit dhe Benficës janë tensionuar muajt e fundit për shkak të disa çështjeve të hapura të transferimeve dhe përplasjeve në merkato, duke përfshirë edhe rastet e lojtarëve si Carreras, Prestianni dhe Vinicius. Në këtë kontekst, largimi i Mourinho-s nga Benfica shihet si pika që ka përkeqësuar më tej marrëdhëniet mes palëve. Trajneri portugez nuk do të vazhdojë te Benfica, pavarësisht se ka ende një vit kontratë. Largimi i tij nuk ka qenë dramatik, por as miqësor, pasi klubi nuk ka pritur mirë deklaratat e tij publike lidhur me ofertën për rinovim kontrate.
Ndërkohë, Mourinho po ndjek me kujdes zhvillimet rreth zgjedhjeve në Real Madrid dhe mbetet i bindur se presidenti Florentino Perez ka shumë gjasa t’i fitojë ato. Ai ka analizuar gjithashtu performancën e fundit të skuadrës dhe ka identifikuar pikat që duhen përforcuar. E ardhmja e tij në Madrid mbetet e hapur, por në pritje të zhvillimeve zgjedhore, çdo vendim përfundimtar pritet të vonohet për disa javë.
