Gati gjysma e votuesve gjermanë do të mbështesnin zhvillimin e zgjedhjeve të parakohshme kombëtare nëse kancelari Friedrich Merz do të largohej nga detyra, sipas një sondazhi të ri të institutit INSA.
Sipas të dhënave, 45 për qind e të anketuarve u shprehën në favor të zgjedhjeve të reja në rast të dorëheqjes së Merz. Ndërkohë, 31 për qind thanë se koalicioni CDU/CSU dhe SPD duhet të përdorë shumicën parlamentare për të zgjedhur një pasardhës.
Presioni politik ndaj kancelarit është shtuar pas rezultateve të dobëta të CDU-së në disa zgjedhje rajonale. Megjithatë, Merz ka deklaruar se nuk ka ndërmend të largohet dhe se do të vijojë zbatimin e reformave të tij.
Sa i përket pasardhësve të mundshëm, 20 për qind e të anketuarve përmendën Markus Söder, kreun e CSU-së dhe kryeministrin e Bavarisë. Hendrik Wüst, kryeministër i Renanisë Veriore-Vestfalisë, mori 14 për qind, ndërsa ministri i Brendshëm Alexander Dobrindt u përmend nga 6 për qind.
Sondazhi tregon gjithashtu një rritje të mbështetjes për AfD-në, e cila arriti në 29.5 për qind, rezultati më i lartë i regjistruar deri tani nga INSA për këtë parti. CDU/CSU u rendit në 19.5 për qind, ndërsa SPD dhe të Gjelbrit morën nga 13.5 për qind.
Partia e Majtë regjistroi 10.5 për qind, FDP 4.5 për qind dhe BSW 3.5 për qind, duke mbetur të dyja nën pragun prej 5 për qind për hyrjen në Bundestag.
Rezultatet e sondazhit vijnë pas një serie rezultatesh të pafavorshme për partitë tradicionale në zgjedhjet rajonale. AfD kryesoi votimet në dy lande të Gjermanisë lindore, ndërsa CDU nuk arriti të sigurojë për herë të parë vende në një parlament landesh.
Pavarësisht presionit të shtuar, Merz ka deklaruar se do të mbetet në krye të CDU-së dhe në postin e kancelarit, ndërsa koalicioni me SPD-në do të vazhdojë punën.
