E mitura, që u përdhunua rreth një javë më parë nga 5 të rinj, dyshohet se është abuzuar seksualisht dhe trafikuar në muajin qershor, kur u shpall e zhdukur.
11-vjeçarja mësohet se është trafikuar nga 7 persona të cilët janë vendosur në pranga rreth tre muaj pas ngjarjes, pas bërjes publike të skandalit të përdhunimit të së miturës nga 5 persona të tjerë.
Të dyshuarit janë identifikuar si: Liridon Gashi, Blendin Sadiku, Gezim Sadiku, Driton Rrahmani, Muhamet Restelica, Flamur Sadiku dhe Muhamet Sadiku, informon Gazeta Sinjali, dhe janë arrestuar ditën e premte (2 shtator).
“Personat e dyshuar (madhor), dyshohet se janë përfshirë në veprimtari penale, gjegjësisht si të dyshuar për kryerjen e veprave penale “Trafikimi me njerëz”, ”Shërbimet seksuale të viktimës së trafikimit” dhe “Dhunimi’”, si dhe, në bazë të provave dhe dëshmive të siguruara deri më tani nga hetimet e zhvilluara, dyshohet se janë të përfshirë në rastin e qershorit, ku e mitura ishte raportuar si person i zhdukur”, u tha në komunikatën e përbashkët të Prokurorisë Themelore të Prishtinës dhe Policisë së Kosovës.
Blutë e Kosovës njoftuar për 6 të arrestuar, por sipas Gazetës Sinjali bëhet fjalë për 7 persona të dyshuar në trafikimin dhe abuzimin seksual të 11-vjeçares.
Rreth tre muaj pas makthit të kaluar në muajin qershor, e mitura dyshohet se u abuzua seksualisht për orë të tëra javën e kaluar nga 5 të rinj, tre prej të cilëve të mitur. Të dyshuarit janë vendosur në pranga dhe janë identifikuar si Ekrem Rexhepi, Gent Rexhepi, Xhabir Salihu, Gentrit Jashari dhe Shkëlqim Kameri.
Pas lajmit për arrestimin e trafikuesve të së miturës në qershor, ka reaguar ministrja e Drejtësisë e Kosovës, Albulena Haxhiu.
“Pse nuk vepronte Prokuroria Themelore në Prishtinë në muajin qershor? Pse nuk u arrestuan asokohe personat e dyshuar? Pse dy muaj me vonesë?
Më e pakta që do të duhej të ndodhte është dorëheqja e kryeprokurorit të Prokurorisë Themelore në Prishtinë dhe prokurorit që ka qenë i ngarkuar ne rastin në muajin qershor.
Pa pasur dorëheqje dhe shkarkime të atyre që nuk vepruan në kohë dhe sipas përgjegjësisë, fatkeqësisht mund të kemi viktima të tjera”, shkroi ajo.
g.kosovari
