Rrjeti social “Facebook”, që kërkon të riforcojë luftën kundër përjekjeve të manipulimit në platformat e saj të ndryshme, njoftoi sot se kishte bllokuar tre kompani të reja që synonin të influenconin opinionin publik, një prej të cilave e lidhur me shërbimet sekrete ruse.
“Ne po punojmë vazhdimisht për të zbuluar dhe ndaluar këtë lloj aktiviteti sepse ne nuk duam që shërbimet tona të përdoren për manipulimin e njerëzve”, nënvizoi Nathaniel Gleicher, zyrtar i sigurisë kibernetike tek “Facebook”, në një postim në blog.
“Ne kemi progresuar në eleminimin e këtij lloj abuzimi, por ashtu si e kemi thënë tashmë, kjo është një sfidë e përhershme”, theksoi ai.
Rrjeti social ka fshirë disa dhjetëra llogari, faqe dhe grupe Facebook-u dhe Instagram-i, jo specifikisht për shkak të përmbajtjes së tyre, por për shkak të mënyrës se si funksionojnë dhe koordinohen për të mashtruar lexuesit e tyre mbi identitetin dhe objektivat e tyre. /e.s/
