Fotografia e dy balerinëve kosovarë – që reflekton një moment emocionues dashurie- është shndërruar në imazh të një festivali austriak të vallëzimit.
E shkrepur për të promovuar shfaqjen e baletit “Xhuljeta pa Romeon”, fotografia me balerinët e Baletit Kombëtar të Kosovës, Teuta Krasniqi e Fatmir Smani, është publikuar në ueb faqen dhe profilin zyrtar në rrjetin social “Facebook” të “Internationale Bühneëerkstatt Tanztheaterfestival”, shkruan “Koha Ditore”.
E audienca e këtij festivali, të dielën mbrëma, i ka parë në lëvizje të dy protagonistët. Një performancë e duos, e shkëputur nga shfaqja e baletit e realizuar me koreografi të Darrel Toulon ka hapur edicionin e 25-të të këtij festivali.
Performanca hapëse e duos nga Kosova qe vetëm paralajmërim për pjesëmarrjen e Baletit Kombëtar të Kosovës në festivalin e njohur të baletit në qytetin austriak. Më 13 dhe 14 të këtij muaji, “Xhuljeta pa Romeon”, – që u dha premierë në Prishtinë në qershor – do të shfaqet para audiencës së “Internationale Bühneëerkstatt Tanztheaterfestival”.
Ky festival ishte themeluar më 1992 si platformë për vallëzim teatri për balerinët dhe aktorët e rinj dhe e ka konceptuar veten si një lloj forumi që synon përmbajtje dhe metoda të reja artistike të komunikimit e mendimit lidhur me vallëzimin në teatër… (b.an)
