Korrespondentit të së përditshmes polake “Gazeta Wyborcza” (GW, qendra e majtë) i është hequr e drejta e ushtrimit të profesionit të tij si gazetar nga Ministria ruse e Punëve të Jashtme dhe duhet të largohet nga Rusia brenda 30 ditësh, njoftoi gazeta e tij.
”Waclaw Radziwinowicz është dëbuar nga Rusia”, bëri të ditur gazeta në faqen e saj në internet.
Radziwinowicz ka qënë korrespondent i GW në Rusi prej vitit 1997.
Ai deklaroi sot në Ria-Novosti se duke nisur që sot, ai nuk mund të ushtronte më profesionin e gazetarit.
Sipas redaktorit të “Gazeta Wyborcza”, Roman Imielski, kjo masë ndëshkimore është një formë hakmarrjeje pas dëbimit nga Polonia të korrespondentit të agjencisë ruse të lajmeve “Ria-Novosti”, Leonid Sviridov, i dyshuar edhe ai për spiunazh.
Sviridov është larguar nga Polonia në fillim të muajit dhjetor, me kërkesë të shërbimeve të kundërspiunazhit polak (ABW), duke braktisur profesionin e tij më pas dhe lejen e qëndrimit.
