Konfirmohet në detyrë Gjovalin Loka, drejtori i Sigurisë në Policinë e Shtetit.
Vendimi është dhënë mesditën e sotme, pasi doli para Komisionit të Jashtëm të Vlerësimit, në kuadër të verifikimeve të kryera gjatë procesit të vetingut.
Ai arriti që të konfirmohet në radhët e policisë pavarësisht dyshimeve se ka qenë bashkëpunëtor i ish-sigurimit të shtetit.
Kjo pasi nga verifikimet e kryera nga komisioni, dyshohet se nga janari i vitit 1991 deri në qershor të po të njëjtit vit, Loka ka qenë operativ i sigurimit të shtetit, teksa deri në vitin 1990 ka qenë student në shkollën e sigurimit të shtetit.
Duke folur në seancë, Loka kërkoi që të mos diskriminohet dhe paragjykohet për shkak të studimeve, duke thënë se nuk ka pasur kontakte me asnjë bashkëpunëtor të sigurimit të asaj kohe.
“Nuk kam dënuar apo keqtrajtuar apo rekrutuar askënd në sigurimin e shtetit”, është shprehur Loka.
Ndër të tjera nga testi psikologjik, Loka ka rezultuar i aftë për ushtrimin e detyrës si dhe është treguar bashkëpunues gjatë procesit të vetingut.
Me vendim të kryepolicit Ardi Veliu, qysh prej vitit 2018, Gjovalin Loka është në krye të Sigurisë në Policinë e Shtetit.
/a.r
