Reperi i njohur shqiptar, Azet, i cili prej vitesh zhvillon karrierën e tij muzikore në Gjermani, ka reaguar pas një ngjarjeje të dyshimtë të ndodhur mbrëmjen e së mërkurës në Düsseldorf.
Mediat gjermane raportuan se një pajisje e dyshuar shpërthyese ka shpërthyer në hyrje të një blloku apartamentesh që figuron në pronësi të artistit.
Lajmi ngriti shqetësim si tek banorët e zonës ashtu edhe tek fansat e reperit, pasi dyshohej se objekti i incidentit mund të kishte lidhje me Azet.
Për të qartësuar situatën, ai publikoi një reagim në Instagram, duke mohuar prerë që ka qenë shënjestër e ndonjë atentati. “Nuk ka pasur asnjë atentat ndaj meje. Unë kam disa prona, përkatësisht banesa kolektive. I prekur ka qenë një nga këto objekte, unë vetë nuk banoj aty. Ngjarja nuk ka lidhje me mua”, sqaroi Azet.
Ai thekson se ndërtesa ku ndodhi shpërthimi është vetëm një nga pronat që zotëron dhe se ai nuk jeton në atë adresë. Ndërkohë, autoritetet gjermane po vijojnë hetimet për të zbardhur rrethanat dhe motivin e mundshëm të incidentit.
Deri më tani nuk raportohet për persona të lënduar, por hetimet pritet të hedhin më shumë dritë mbi shkaqet e ngjarjes në ditët në vijim.
