Kryeministri Edi Rama zhvilloi pasditen e kësaj të hëne një takim me përfaqësues të agroturizmit të Tiranës, ku foli për projektin “Dyfisho ndërmarrjen tënde” dhe për paketën e maleve.
Rama tha se të gjitha ndërmarrjet e vogla dhe të mesme do të mbështeten nga qeveria përmes Bankës së Shqipërisë dhe bankave të nivelit të dytë, me kredi për t’i ndihmuar në rritjen e tyre.
Ai tha se interesi i kredive do të jetë më i ulët se ai i kredive komerciale.
“Programi i ri kombëtar që ne po përgatisim do të lançohet së shpejti. Në fund të muajit do të kemi marrëveshjen mes BSH-së, bankave të nivelit të dytë dhe qeverisë për një linjë financimi të mbështetur nga qeveria shqiptare, për të mbështetur çdo projekt të kujtdo që ka një ndërmarrje të vogël ose të mesme dhe ka ambicien ta rrisë atë. E kemi quajtur programin “Dyfisho ndërmarrjen tënde”. Ky program do të mbështetet nga një linjë e drejtpërdrejtë kredie nga BSH-ja, e cila do të përpunohet nga bankat e nivelit të dytë dhe do të garantohet nga qeveria shqiptare, dhe do të ketë një interes të kredisë më të ulët se kreditë komerciale. Do të ketë një limit deri në 2 milionë euro. Nuk do të jetë e mundur të aksesohet nga kompanitë e mëdha, por do të aksesohet nga start-up-et, nga agroturizmat që do të duan të rriten. Kur flasim për rritje të agroturizmit, unë nuk kam parasysh rritjen e numrit të dhomave; rritje e agroturizmit është edhe zgjerim i kapaciteteve prodhuese dhe përpunuese jashtë kufijve të vet”, tha Rama.
