Sulmuesi argjentinas Paulo Dybala i ka siguruar Juventusit fitoren ndaj Lazios me një gol të shënuar në minutën e 93-të të ndeshjes.
Kur mendohej se Lazio ia frenoi Juventusit ecurinë e fitoreve në Serie A, super Dybala u sigurua që “Zonja e vjetër” ta regjistrojë edhe fitoren e 10-të rresht.
Juventus e kontrolloi ndeshjen duke mbajtur topin në posedim për pjesën më të madhe të saj, por shënoi vetëm në fund dhe atë me goditjen e vetme në portë. Për dallim, Lazio u tregua më e rrezikshme me katër goditje drejt portës.
Juventus vazhdon të jetë në vendin e dytë në Serie A dhe pas kësaj fitoreje ka 68 pikë, një më pak se lideri Napoli, i cili ka një ndeshje më pak të zhvilluar.
Ndërkohë, Lazio ruan pozitën e tretë me 52 pikë, një më shumë se Interi i katërti dhe dy më shumë se Roma në vendin e pestë, skuadra të cilat kanë nga një ndeshje më pak të luajtur. /a.m.
