Ilir Meta është treguar i ashpër sot kundër Edi Ramës dhe Lulzim Bashës ndërsa ka komentuar edhe task-forcën që po shkarkon nga puna elementë të përfshirë në fushatën elektorale.
I ftuar në ‘Opinion’ Meta tha se demokracia dhe zgjedhjet e lira janë në rrezik ashtu sikurse ishin përpara 17 Majit, pavarësisht marrëveshjes së arritur.
“Deri më 17 maj ishim pranë një krize katastrofike për shkak se rrezikonte që opozita të mos merrte pjesë në zgjedhje. Dy individët Rama dhe Basha kanë bërë një përpjekje të pandershme kundër standardit të zgjedhjeve” – tha Meta.
Ish-kreu i LSI theksoi se Rama dhe Basha kanë krijuar në mënyrë të erret një task-forcë si Gestapo duke shkelur ligjet e shtetit dhe ku nuk ka asnjë anëtar të LSI-së.
“As ministrja e Integrimit Europian nuk bën pjesë në këtë task-forcë edhe pse zgjedhjet lidhen me integrimin. Të dy, Rama dhe Basha, kanë marrë përsipër një mision të dështuar” – tha presidenti i zgjedhur.
I pyetur për argumentin e Ramës së “Meta përfaqëson PD si president pa qenë anëtar i PD-së”, ish-kreu i LSI iu përgjigj me batutë.
“Kjo është njësoj sikur unë të them se zoti Basha përfaqëson Rilindjen më shumë sesa çdo socialist” – tha Meta.
Meta ka pranuar sonte se krisjet me Ramën kanë nisur që në vitin 2015. Ai tha se kjo ka ndodhur pas zgjedhjeve lokale dhe lidhet me rezultatin e tyre. Ish-kreu i LSI tha se kjo krisje u pasua edhe me hapjen e çeshtjes CEZ-DIA.
Sipas kreut të Kuvendit Edi Rama kërkonte të kapte Drejtësinë përmes reformës dhe se nuk e donte opozitën në zgjedhje.
/javanews/b.d
