Dy shqiptarë janë vënë në prangat e policisë italiane të Cosenzas, të kapur me 3 kilogramë heroinë.
Në komunën e Roseto Capo Spulico, policia ndaloi një makinë në të cilën ndodheshin dy shqiptarë të cilët po udhëtonin në autostradë.
Përballë deklarimeve të dyshimta lidhur me vendin nga ishin nisur dhe destinacionin e tyre si dhe nervozizmin e shfaqur, policia kreu kontrollin e imtësishëm në mjet ku fillimisht u zbulua 1 kilogramë e 350 gramë heroinë.
Hetimet e mëvonshme të nxjerra nga kontrolli i bazës së të dhënave për llogari të të arrestuarve, njëri prej të cilëve me precedentë të shumtë specifikë kriminalë dhe policorë, çuan në kontrollin e banesës së tij.
Me të mbërritur në banesë, policia gjeti të fshehur dhe 1 kilogramë e 550 gramë heroinë, 15 gramë hashash si dhe materiale për ndarjen dhe paketimin e heroinës.
E gjithë lënda narkotike e gjetur, me vlerë tregu shkon mbi 200 mijë euro. Ndaj shqiptarëve të arrestuar hetimet janë në vijim për të zbuluar më shumë lidhur me aktivitetin dhe bashkëpunëtorët e tyre.
/a.r
