Pas arrestimit të dy prokurorëve në Fier dhe Krujë brenda 2 javëve, ministri i Drejtësisë Ylli Manjani paralajmëron se do ketë të tjerë të prangosur. Një listë me prokurorë e gjyqtarë po hetohet nga inspektoratet e Ministrisë së Drejtësisë dhe Këshillit të Lartë të Drejtësisë, pas indicieve të Inspektoratit të Deklarimit dhe Kontrollit të Pasurive për parregullsi.
“Sigurisht që ka emra të tjerë, sigurisht që ne këtë punë bëjmë bashkëpunojmë me Inspektoratin e Lartë të Deklarimit të Pasurive sepse ata e nisin procedurën e verifikimit të aseteve. Ka disa vështirësi ligjore, ka disa vështirësi teknike por sidoqoftë ka një listë jo të vogël më gjyqtarë në këtë rast që inspektohen nga te dyja inspektoratet jo thjesht nga inspektorati i Ministrisë së Drejtësisë”, – u shpreh ministri Manjani.
Në një intervistë për Report TV, Manjani shprehet se pret nga organi i Akuzës jo vetëm spastrim në radhët e drejtësisë por dhe qeverisë.
“Nuk kam ndonjë konstatim ekstra, nuk kam ndonjë konstatim të veçantë për x prokuror apo për y prokuror përfshirë këtu dhe Prokurorin e Përgjithshëm i cili është në krye të detyrës dhe ka gjithë mbështetjen time për çdo lloj ndërhyrje të kësaj natyre në elementë si brenda radhëve të saj po ashtu në radhët e gjyqësorit, gjithashtu dhe në radhët e ekzekutivit kudo qoftë dhe për çfarë do lloj arsye”, tha Manjani.
Prokurori i Fierit Petrit Vukaj dhe ai i Krujës Haxhi Giu, i njohur dhe si prokurori i çështjes “Hajdari” u arrestuan brenda 2 javëve të fundit për korrupsion dhe marrje ryshfeti.
Ndërkohë të gjithë ambasadorët e huaj në vendin tonë kanë shprehur habinë ndaj faktit që njerëzit e drejtësisë nuk mundohen të fshehin pasurinë që nuk e justifikojnë dot me pagat e marra. Shqiptarja.com
