Manushaqe Pirraci, nëna e dy vajzave të zhdukura disa ditë më parë në Durrës ka 10 ditë që pret me sytë nga rruga. Nuk asnjë lajm prej tyre që prej asaj mesnate kur ikën për të mos u kthyer. 45-vjeçarja tregoi se dy vajzat e saj Sidorela 19, dhe Ersilda 16 vjeçe, janë larguar edhe here tjera, por që janë kthyer në banesë disa ditë më vonë.
Pasi nuk ka asnjë lajm prej vajzave të saj nëna me origjinë nga Burreli e banim në skajin më periferik të ish-Kënetës iu drejtua policisë të bëjë të mundur gjetjen e tyre. Si nëne ajo i druhet faktit se vajzat mund të përfundojnë ne rrugë të dhunuara, apo në rrjetin e drogës e të prostitucionit. Sidorela mbaroi shkollën e mesme donte të vazhdonte shkollën e Policisë, por nuk e pati dot mundësinë. Vajza më e vogël ka mbaruar klasën e tetë.
Gruaja tregon se ajo dhe bashkëshorti i saj mbërritën nga zonat e thella të Bulqizës 15 vjet më parë. Në familjen 6 anëtarëshe vetëm bashkëshorti punon si varrmihës, ndërsa djali më i madh i familjes iu drejtua azilit ekonomik në Francë, ku qëndroi për gati një vit, por u kthye sapo mësoi largimin e motrave. Kryefamiljari është i dehur në të gjitha ditët e javës. Vajzat janë larguar shumë herë nga familja, me pretendimin se shkojnë nëpër festa tek shoqet, në Durrës, Tiranë apo edhe Vlorë thotë nëna. Nëna i druhet frikës se vajzat mund të bien pre e prostitucionit dhe drogës e kryesisht nga vajza e vogël.
Banesa e tyre është mjaft e varfër. Çdo orendi është e dhuruar ose e mbledhur. Madje në këtë banesë nuk ka as televizor apo sende të tjera të domosdoshme. Dysheku i dhuruar ku flinin vajzat ka mbetur në dhomë. Familja nuk ka përfituar asnjëherë ndihmë ekonomike apo sociale. Varfëria këtu është ulur këmbëkryq. As gjërat më minimale nuk u plotësohen fëmijëve. Madje banesa është edhe pa portë./Balkanweb
