Skandali i motrave Kajtazi nga Durrësi nuk ka fund. Pas rrëfimit të bërë prej tyre në një video të gjatë rreth 88 minuta, ku dy motrat nxorrën “të palarat” e familjes, këtë radhë është babai i tyre Hiqmet Kajtazi që ngre shqetësimin.
Në një prononcim për gazetën “Panorama”, ai tregon se pas videos nuk kanë munguar debatet dhe kërcënimet nga ana e personave të fisit të përmendur nga vajzat që sipas tyre përgojoheshin nga familja.
“Jemi në një hall shumë të madh. Personat e përmendur në video nga vajzat kërkojnë llogari dhe me të drejtë edhe kërcënojnë, pasi besojnë se gjithçka që Orialda dhe Klevisa kanë folur është e vërtetë. Na kanë marrë në telefon dhe kanë ardhur në shtëpi dhe na kanë bërë për një lek. Nuk di çfarë përgjigje t’u kthej. Si pasojë e papërgjegjshmërisë së vajzave, jemi shumë të turpëruar dhe njëkohësisht të kërcënuar”, u shpreh Hiqmet Kajtazi, babai i Orialdës dhe Klevisës, 18 dhe 14-vjeçare, të cilat sot, me rrëfimin e tyre, kanë futur në sherr prindërit dhe farefisin e tyre.
