Nga Ben Andoni
Të dy koalicionet e partive kosovare dhe Vetëvendosja nuk po mbahen nga premtimet, që duken hapur krejt jashtë realitetit. Porse kosovari i thjeshtë nuk do të besojë më fryrjet e mëdha, që bëjnë palët. E para dhe një nga premtimet më të shpejta është ajo që ka lidhje me heqjen e vizave dhe që partitë e kanë premtuar deri për 90 ditë, kurse e dyta është ajo që ka lidhje me bërjen e ushtrisë. Nuk po flasim për ekonominë, arsimin dhe shëndetësinë sepse premtimet në këto lëme janë të shpeshta. Ajo që është parë dhe që është vërtetuar nga mungesa e debatit të përbashkët të kandidatëve për kryeministër është mungesa e vizionit dhe përshtatja e premtimeve me burimet reale, që mundësojnë realizimin.
Pra, kur thuhet heqja e vizave, si do të realizohet procesi i Demarkacionit për të cilin ka kundërshti të mëdha dhe që Mali i Zi me gjithë dashamirësinë, e quan modelin e tanishëm si më të mirin. Si do të procedohet nga partitë? Të kujtojmë se koalicioni që e kërkon më së shumti atë, ai i PDK-AAK dhe NISMA ka pasur kundërshtarët më të mëdhenj të demarkacionit dhe po ashtu edhe mbrojtësit më të mëdhenj (Kujtojmë PDK).
Koalicioni tjetër që udhëhiqet nga LDK dhe ka në grupimin e vet AKR e Pacollit po përpiqet të afrojë vizionin e saj për pjesën ekonomike, pasi edhe kandidati i tyre për kryeministër , Abdullah Hoti, është një ministër që lidhet me problemet ekonomike. Në fakt, edhe kjo parti veç premtimeve dhe disa ideve nuk jep platforma të qarta sesi do të zhvillohet mirëqenia e kosovarëve.
Ndërkohë që dy organizime D+ dhe Çohu kanë parë sesi po shkon fushata e partive politike në media, duke përfshirë televizionet, portalet dhe gazetat.
Koalicioni LDK, AKR dhe Alternativa ka prioritet në pjesën e medias print me 3560 euro të shpenzuara për katër ditë, kurse PDK, AAK dhe Nisma kanë shpenzuar 3250 euro. Lëvizja Vetëvendosje ka shpenzuar shumë më pak se të dyja ose vetëm 260 euro për katër ditët e para të fushatës. Çuditërisht për reklamat prin Zëri me 41 reklama, kurse Epoka e Re mbart 18 syresh. Gazetat e tjera ditore kanë pasur një numër shumë më të vogël të reklamave.
Kurse sa i përket televizionit në monitorimin e RTK, KTV, Klan Kosova dhe RTV 21 është parë se pjesa e luanit është te PDK, AAK dhe Nisma që në këtë periudhë kanë shpenzuar 55,251 euro për reklama në media. Kurse LDK, AKR dhe Alternativa shpenzuan vetëm 25,970 euro. E fundit sërish mbetet Lëvizja Vetëvendosje që ka paguar 3,661 euro për transmetime. Partitë tjera politike kanë shpenzuar të gjitha bashkë vetëm 5,883 euro.
Dhe po ashtu koalicioni PDK, AAK dhe Nisma prin edhe tek portalet teksa kanë shpenzuar 23,350 euro, ndërsa LDK, AKR dhe Alternativa kanë shpenzuar 20,500 euro në këto reklama për katër ditë. Spotet televizive janë më shumë në krahun e koalicionit që prihet nga LDK me 21.400 Euro krejt ndryshe nga 17,300 euro të PDK, kurse Vetëvendosja mbetet me vetëm 1,700 euro.
Shuma të mëdha shkojnë mitingjet, por këtu avantazhi është te PDK, AAK dhe Nisma që kanë shpenzuar 36,000 euro, kurse LDK, AKR dhe Alternativa 44,000 euro dhe Vetëvendosje 28,000 euro.
Me pak fjalë, një fushatë e plotë në imazh, në shpenzime, por shumë e dobët sa i përket realisht asaj që prezantohet dhe asaj që duhet të arrihet. (JavaNews)
