Kryebashkiaku i Prishtinës, Përparim Rama është infektuar me koronavirus, vetëm dy ditë pas vizitës zyrtare në Shqipëri.
Është vetë ai që e ka bërë të ditur këtë me anë të një postimi në rrjete sociale. Rama shkruan në Facebook se është izoluar menjëherë dhe ka anuluar të gjitha takimet e parashikuara.
Postimi i Përparim Ramës:
Të dashur qytetarë, sapo jam njoftuar nga IKSHPK se kam rezultuar pozitiv me COVID-19. Jam izoluar menjëherë sapo kam kuptuar që kam patur kontakt me persona të cilët kanë rezultuar pozitivë, dhe kam anuluar të gjitha takimet e parashikuara. Për momentin, nuk kam asnjë simptomë dhe po e vazhdoj punën prej shtëpisë, duke u koordinuar me ekipin tim në mënyrë që proceset e punës të vazhdojnë normalisht gjatë ditëve të ardhshme.
Dy ditë më parë, Përparim Rama ishte në një vizitë zyrtare në vendin tonë, ku u takua dhe me kryebashkiakun Erion Veliaj.
Veliaj i dhuroi kryebashkiakut të Prishtinës Çelësin e Tiranës teksa sëbashku vizituan dhe Teatrin Kombëtar Eksperimental “Kujtim Spahivogli” për premierën “Unë, Mephisto”.
/b.h
