Në vetëm pak ditë në aksin Korçë- Pogradec janë shënuar dy aksidente me vdekje. Viktimat kanë qenë kalimtarë të cilët janë përplasur nga mjetet në afërsi të fshatrave Çiflig e Bulgarec.
Sipas qytetarëve, në këtë aks rrugor, aksidentet janë të shpeshta për shkak të mosrespektimit të rregullave të qarkullimit rrugor si nga drejtuesit e mjeteve por edhe nga kalimtarët.
Ata shprehen të frikësuar nga këto ngjarje, ndërsa thonë se janë të detyruar të kalojnë rrugën disa herë në ditë pasi kanë tokat në anën tjetër. Në këto kushte, kërkojnë më tepër kontrolle nga ana e policisë, apo edhe ndërtimin e mbikalimeve në disa vende ku është e nevojshme.
“Aq aksidente po bëhen, kalojmë rrugën me frikë”, tha një qytetare.
“Po ndodhin shumë aksidente. Duhet mbikalim edhe ne duhet të ruhemi. Po edhe shoferët pinë, tani nuk dallon dot. Këtu janë vrarë 5 apo 6 njerëz”, u shpreh një qytetar.
Që nga Kapshtica e deri në Qafë Thanë numërohen rreth 157 kryqëzime e degëzime përgjatë aksit nacional, ku në shumë prej tyre kanë ndodhur aksidente me pasoja. Ekspertet e sigurisë rrugore por edhe vetë qytetarët gjatë viteve kanë ngritur zërin për shumë njolla të zeza të cilat janë kthyer në burim aksidentesh, por situata vijon të jetë e njëjtë.
