Një ditë pasi 16-vjeçari Angjelo Gjakozaj humbi jetën pasi u qëllua me thikë në zemër nga bashkëmoshatari i tij Devi Lala në lagjen 15, në Spitallë të Durrësit. Burime pranë policisë së Durrësit konfirmojnë për balkanweb se 17-vjeçari Lala thotë se gjithçka e ka bërë për vetëmbrojtje, madje se ishte Angjelo, ai që e ka qëlluar i pari.
“Ai më qëlloi i pari me celular në kokë, më qëlloi me grushte pastaj. Aty nuk durova”,- ka thënë Lala në polici.
Ndonëse i druhet një konflikti mes dy familjeve adoleshenti ka treguar me detaje se sherri mes tyre nisi vetëm se tjetri po e shikonte.
“U ktheva në lagje, aty ku rri gjithnjë. Aty u hasa me Anxhelon. Po më shikonte. Pse më shikon i thashë, ka ndonjë gjë për të parë?! Ai më ofendoi, më shau. I thashë, pusho se do ta pësosh keq, ai vazhdonte të më shante. Edhe unë nisa ta shaja dhe u përleshëm fizikisht. Në një moment nxora thikën dhe e qëllova disa herë. Nuk më kujtohet se sa herë i qëllova, pasi isha në gjakënxehtësi e sipër. Por, pashë që mbeti i shtrirë në tokë dhe u mbulua nga gjaku. Në këtë moment u tremba dhe u largova, pak metra më tej hodha thikën në një kanal. Nuk kishim ndonjë konflikt, thjesht antipati për njëri-tjetrin. Unë nuk kisha për qëllim ta vrisja, thjesht doja të mbrohesha, pasi u përleshëm me njëri-tjetrin”,- ka thënë i riu në polici.
(Në foto, viktima)
NGJARJA
Ngjarja tragjike u regjistrua pak para mesditës së djeshme në lagjen 15 të qytetit bregdetar. Adoleshentët, banorë të së njëjtës lagje, ishin takuar rastësisht pranë zonës ku ata banojnë dhe kanë nisur të grindeshin.
Dëshmitarët që ndodheshin në vendin e ngjarjes kanë sqaruar për Policinë se gjithçka ka ndodhur në harkun e pak minutave. Fillimisht, sipas dëshmitarëve, adoleshentët kanë debatuar ashpër me njëri-tjetrin “kush je tikush jam unë”, më pas edhe janë fyer mes tyre. Në këtë moment ata janë përleshur me njëri-tjetrin dhe papritur 17- vjeçari nxori thikën që mbante me vete dhe e qëlloi tri herë Gjokazajn, dy herë në pjesën e kraharorit dhe një herë në shpatull.
Goditja në shpatull ishte shumë e thellë dhe thika i kishte prekur zemrën. 16-vjeçari u transportua me urgjencë drejt spitalit, por ai nuk arriti t’i mbijetojë plagës dhe pak orë më vonë ndërroi jetë. Ndërkohë, menjëherë pas ngjarjes, 17-vjeçari hodhi thikën në një kanal pranë vendit të krimit dhe u largua me shpejtësi, për t’u vënë në pranga pak minuta më vonë nga Policia, e cila u ndihmua për identifikimin e tij nga dëshmitarët, që ndodheshin në ato momente në vendin e krimit.
