Tenton vetëvrasjen në vendin e punës, shpëton për mrekulli 29-vjeçarja pas transportit në spital. Ngjarja ndodhi dy ditë më parë në Shënvlash, në rrobaqepësinë ku punonte shtetasja F.S, shkruan “Panorama” duke zbardhur disa detaje te tjera nga ngjarja.
Fatmirësisht, ajo u pikas nga koleget në momentin që preu damarët e njërës dorë dhe u transportua me urgjencë drejt spitalit të Durrësit. Pas ndërhyrjes, 29-vjeçarja arriti të mbijetonte. Dhjetëra kolege të saj, të cilat u ndodhën në vendin e ngjarjes, u përfshinë në panik nga veprimi ekstrem i 29-vjeçares. Ato kanë pohuar se mbetën të shokuara kur panë kolegen e tyre teksa tentonte vetëvrasjen, duke prerë damarët e njërës dorë.
Policia e Durrësit nisi hetimet për rastin në fjalë, për të mësuar motivin që shtyu drejt këtij akti të renë. Bazuar nga të dhënat paraprake dhe dëshmitë nga koleget e familjarët e 29- vjeçares, Policia ka dalë në përfundimin se ajo ishte në gjendje të rënduar psikologjike, kur tentoi vetëvrasjen.
Fakti që zgjodhi vendin e punës për t’u vetëvrarë, ka bërë që Policia të mendojë që motivi mbetet aty për aty. Hetuesit kanë verifikuar nëse ajo ka pasur probleme në vendin e punës apo me pagat, por sipas Policisë, gjithçka ka qenë në rregull. /PANORAMA
