Pas një kostoje gjigande për arkat e shtetit shqiptar në dhjetë vitet e fundit, pasi është inauguruar disa herë me pompozitet në çdo segment të saj, pasi është bërë subjekt i akuzave zyrtare të Prokurorisë për më shumë se 200 milion euro në ngarkim të ish-ministrit Basha, Rruga e Kombit vijon të mos “ngopet”.
Gjashtë vite pas përurimit zyrtar, rritja e faturës për rrugën “Durrës-Morinë” nuk ka të ndalur. E inauguruar disa herë, duke se ‘Rruga e Kombit’ do vazhdojë të përpijë lekët e taksapaguesve. Dhe jo vetëm kaq. Ministri Arben Ahmetaj ka bërë të ditur se për ta standardizuar segmentin Durrës – Morinë do të duhen të paktën edhe 160 milionë euro. Qeveria po tenton, që mirëmbajtjen e rrugës t’ia kalojë me koncesion privatit, por sipas Ahmetajt, as kjo nuk ka për ta zgjidhur mungesën e financimit. Sepse, siç tha Ahmetaj: Shqipëria nuk i ka ato para.
Qeveria pretendon se do të ruajë një nivel të lartë të investimeve publike, edhe pse në të njëjtën kohë bën të mundur uljen e borxhit. “Do të investohet 5,1 për qind e PBB-së dhe është një sukses i drejtpërdrejtë dhe i koordinuar me uljen drastike të deficitit”, tha më tej Ahmetaj. Nga ana tjetër, opozita shprehet se shifra e investimeve publike është fryrë artificialisht, pasi qeveria ka përfshirë në të subvencionet për KESH-in dhe fondet, që janë të lidhura me realizimin e të ardhurave nga dividenti, që sipas saj është i pamundur.
Veç vëllimit, opozita akuzon se qeveria ka cënuar edhe cilësinë e investimeve, duke i orientuar ato në projekte pa efekt për ekonominë.
“Harxhohen 700 milionë dollarë investime publike në vit, një kantier ndërtimi nuk ka funksional në territorin e vendit”, deklaroi më tej Bode. Por Ahmetaj është përgjigjur se 83 për qind e investimeve shkojnë në projekte në vazhdim. 17% janë projekte të reja.
Shpenzimet e buxhetit të ardhshëm do të jenë mbi 452 miliardë lekë, prej të cilave 417 miliardë vijnë nga të ardhurat, ndërsa pjesa tjetër janë huamarrje.
E ndërsa në dhjetor mbyllet procedura e koncensionit për rrugën në fjalë, kjo mesaduket nuk do ta zgjidhi njëherë e mirë investimin.
