Histori si nëpër filma po ndodhin në Shqipëri, ku një prej tyre është ajo e regjistruar në Durrës. Një grua rreth 52 vjeçe, banuese e qytetit bregdetar është vënë nën akuzë penale nga gjykata lokale pasi akuzohet për veprën e mashtrimit.
Shegushe B., është denoncuar nga një familje durrsake se është duke abuzuar me ish burrin e saj të ndjerë, Artan L.
I ndjeri humbi jetën afro pesë vjet më parë në një aksident të ndodhur në Francë.
Më herët Artani ishte i martuar me Shegushen por ishin divorcuar.
Prindërit e Artanit kanë denoncuar penalisht Shegushen se ka falsifikuar dokumente gjatë përpjekjeve për t’u rimartuar me djalin e vdekur.
E gjitha mendohet të jetë shkaktuar nga një shumë e madhe parash që sigurimet janë të detyruara të paguajnë për familjarët e të ndjerit, pas aksidentit të pësuar fatalisht në Francë.
Praktikisht paratë i jepen familjarit më të afërt por në këtë rast, ish gruaja synon që t’i fitojë ajo duke u rimartuar me të shoqin.
Gjykata e Rrethit Durrës po shqyrton këtë dosje delikate ku Shegushja ka depozituar një kërkesë për “rivendosje në afat të së drejtës për të ankimuar vendimin e divorcit”, me argumentin se ajo nuk ishte në dijeni të gjyqit për divorcin e saj, në qershor 2009.
Gjykata e Apelit në Durrës ka vendosur të prishë vendimin e divorcit të saj. P ashtu ka vendosur edhe pushimin e çështjes, me argumentin se një çështje për zgjidhje martese nuk mund të vazhdojë kur njëri prej bashkëshortëve ka vdekur.
Ky vendim ka bërë që Zyra e Gjendjes Civile në bashkinë Durrës, të kthejë në statusin e mëparshëm gjendjen e bashkëshortëve Artan L. dhe Shegush B. Vetëm se tani Shegushja nuk quhet më as e martuar dhe as e ndarë, por e vè.
Në këtë mënyrë Shegushja ëhstë ribërë pjesë e trungut familjar. Ajo ka bërë padi në gjykatë ndaj vjehrrit dhe vjehrrës së saj, prindër të Artanit të ndjerë, duke i akuzuar se në mënyrë të padrejtë e kanë përjashtuar nga përfitimi i trashëgimisë.
Kjo gjykatë i ka dhënë të drejtë. Edhe Apeli po ashtu.
Në janar 2016, dosja shkoi në Gjykatën e Lartë. Kjo e fundit vendosi që ta rikthejë çështjen për gjykim në gjykatën e Rrethit Durrës.
Sakaq një tjetër proces gjyqësor, penal, po zhvillohet në gjykatën e Durrësit me gjyqtare Eda Kaja. Shegushja kërkon deklarim të pavlefshëm të akteve të dosjes, me pretendimin se janë shkelur afatet e hetimit. Kurse prokuroria mbron tezën se hetimi është bërë brenda afateve të përcaktuara në ligj.
Tani ajo që vihet në pikëpyetje është e ardhmja e pasurisë financiare që la i ndjeri përmes sigurimeve: Kush do t’i marrë paratë, gruaja e ndarë më 2009 me vendim gjykate dhe e rikthyer si bashkëshorte gjashtë vjet më pas, apo familjarët e të ndjerit. /noa/a.k
