Moti i keq ka shkaktuar vonesa të theksuara në mbërritjen e trageteve nga portet italiane në atë të Durrësit.
Siç raportohet deri më tani, dy tragete janë nisur me vonesë nga porti i Barit, në fqinjin e përtej Adriatikut. Ata pritej të mbërrinin rreth orës 8 të mëngjesit të kësaj të premteje, por për shkak të motit të keq, njëri pritet të mbërrijë rreth orës 12:30, ndërsa tjetri nga pasditja, rreth orës 17.
Një tjetër traget, ai i nisur nga Ankona në Itali, ka mbërritur gjithashtu me një orë vonesë në terminalin e Durrësit paraditen e sotme.
Edhe pse moti duket se nuk i favorizon lundrimet, deri përpara mesnatës priten të mbërrijnë edhe dy tragete të tjera nga Bari.
E njëjta situatë raportohet edhe nga Porti i Vlorës, ku trageti i nisur nga Brindisi nuk ka mbërritur ende, edhe pse duhej të kishte ardhur rreth orës 7:30 të mëngjesit.
Trageti i linjës Brindisi-Vlorë, i nisur me vonesë për shkak të motit të përkeqësuar dhe detit të dallgëzuar, pritet të mbërrijë në portin jugor rreth orës 14.
a.cupaj
