Kryetari i Partisë Demokratike Lulzim Basha ka prezantuar sot në Durrës kandidaten e djathtë për këtë bashki, Grida Duma.
Gjatë fjalës së tij, Basha e cilësoi Dumën si “cunamin” e PD që pritet të sjellë fitoren dhe ndryshimin për Durrësin.
“Askush nuk mund të prekë ‘cunamin’ e Partisë Demokratike që do të sjellë ndryshimin”, theksoi Basha.
Basha u ndal edhe në incidentin e djeshëm, një konflikt mes militantëve të PS dhe atyre të PD. Sipas Bashës, Vangjush Dako, kryetari i bashkisë Durrës, ka filluar ta ndiejë frikën e humbjes së pushtetit dhe ndaj ka nisur “të sulmojë me bandat e tij”. Por sipas Bashës fitorja e Dumës është e pashmangshme dhe do t’i hapë rrugën fitores së demokratëve në të gjithë vendin.
“Vangjush Dako po sulmon me banda fushatën e PD. Kjo tregon frikën nga shembja e pushtetit që mban. Mos guxoni të prekni të rinjtë tanë, pasi do ju dalë zjarri në çati. Fitorja e Dumës në Durrës është e pashmangshme”, theksoi Lulzim Basha.
Redaksia Online
(JavaNews.al)
