Policia e Durrësit ka ndaluar drejtuesin e automjetit që u përfshi në aksidentin ku humbën jetën 2 persona dhe u plagosën 4 të tjerë, ndërsa nisi procedimin penal për shpërdorim detyre ndaj administratorit të kompanisë kontraktuese për mirëmbajtjen e aksit rrugor ku ndodhi aksidenti, pjesë e unazës Shkozet-Plepa.
Adis Barzezi, 28 vjeç, banues në Tiranë, që ka qenë drejtuesi i mjetit, gjatë testit të alkoolit rezultoi se kishte konsumuar alkool në masën 0.53 mg/l.
Në vijim të hetimeve, specialistët e antikorrupsionit në Policinë Durrës nisën procedimin penal në gjendje të lirë ndaj shtetasit Hamza Islamaj, 49 vjeç, administrator i subjektit kontraktues për mirëmbajtjen e aksit rrugor. Nga kqyrja e vendit të ngjarjes rezulton se subjekti nuk ka zbatuar me përpikmëri kushtet teknike dhe nuk ka zëvendësuar barrierat mbrojtëse të sigurisë, të cilat kanë qenë të dëmtuara.
Aksidenti ndodhi mëngjesin e së shtunës, në rrugën urbane kryesore Plepa-Mbikalimi i Shkozetit, ku mjeti tip Peugeot me targa TR 4863 R doli nga rruga. Për pasojë, humbën jetën 2 pasagjerët, Ardian Sallaku (37 vjeç) dhe Vito Mehmeti (25 vjeç), të dy banues në Shkozet.
Gjithashtu, u plagosën dhe ndodhen nën kujdesin e mjekëve 4 shtetas.
TCH/d.i.
