Durmishi: Kam gjak shqiptari, s’jam tradhtar
Ndoshta pak e njihnin. Luante me një nga skuadrat kryesore daneze, Brondby, kishte spikatur me kombëtares U-21 të këtij vendi në Europianin e vitit të shkuar, por nuk kishte rënë në “radarët” e De Biazit apo të zyrave të talenteve të FSHF-së nëpër Europë. U bë “kryefjalë” vetëm kur e ftoi trajneri Morten Olsen për dy ndeshjet kualifikuese të shtatorit.
Fjala ishte për Riza Durmishin, 20-vjeçarin me prindër shqiptarë, të cilët janë zhvendosur prej kohësh nga Tetova e Maqedonisë dhe janë vendosur në Danimarkë.
Atje ka lindur dhe është rritur, edhe si futbollist, mbrojtësi anësor i kombëtares daneze, që debutoi ndaj Shqipërisë, më 4 shtator, në Kopenhagë, por luajti edhe ndaj Armenisë, 3 ditë më vonë.
Shumë e quajtën tradhtar, gjë e cila e ka vrarë shpirtërisht Durmishin, i cili për një stacion televiziv të shqiptarëve në Skandinavi, “AlbanskTV RTVZIK”, shpjegohet qartësisht në gjuhën shqipe.
Madje, ai thotë se e dinte shumë mirë himnin kombëtar të Shqipërisë dhe e ka kënduar brenda vetes, para ndeshjes kualifikuese të 4 shtatorit, në “Telia Parken”.
Nuk e mohon kurrë se nga i ka rrënjët, duke pohuar se “ka gjak shqiptari” dhe këtë gjë s’e ka fshehur asnjëherë. Tërë Danimarka për të tillë e njeh. “Unë flas shqip, krejt shokët i kam shqiptarë, ndaj s’ka pse më quan askush tradhtar,” – nënvizon mes të tjerash Riza Durmishi, intervistën e plotë të të cilit mund ta ndiqni në videot shoqëruese të këtij shkrimi.
