Drejtuesi i Prokurorisë së Posaçme Kundër Korrupsionit dhe Krimit të Organizuar (SPAK), Altin Dumani ka zhvilluar një takim në Podgoricë me Kryeprokurorin Special të Malit të Zi, Vladimir Novović.
Takimi u përqendrua në forcimin e bashkëpunimit mes dy institucioneve për luftën kundër krimit të organizuar transnacional, me fokus të veçantë luftën ndaj trafikut të lëndëve narkotike.
Sipas njoftimit zyrtar të SPAK, gjatë takimit u vlerësua bashkëpunimi i deritanishëm mes dy vendeve, i cili është konsideruar i shkëlqyer, dhe u diskutuan hapa konkretë për të intensifikuar përpjekjet në zbulimin dhe ndjekjen penale të autorëve të trafikut të drogës.
“Drejtuesi i SPAK, z. Altin Dumani, u takua sot në Podgoricë me Kryeprokurorin Special të Malit të Zi, z. Vladimir Novović. Gjatë takimit u vlerësua bashkëpunimi i shkëlqyer mes dy institucioneve në luftën kundër krimit të organizuar transnacional, me theks të veçantë në zbulimin dhe ndjekjen penale të autorëve të trafikut të lëndëve narkotike, në të dy vendet“, thuhet në njoftimin e SPAK.
Përveç takimit në Mal të Zi, kreu i SPAK, Altin Dumani, ka zhvilluar kohët e fundit edhe një vizitë të rëndësishme në Shtetet e Bashkuara të Amerikës, ku ka marrë pjesë në takime me autoritete të larta të drejtësisë amerikane.
Sipas SPAK, në cilësinë e Drejtuesit të Strukturës së Posaçme kundër Korrupsionit dhe Krimit të Organizuar, Altin Dumani zhvilloi takime të nivelit të lartë gjatë vizitës zyrtare në Washington D.C, në Shtetet e Bashkuara, më 2 dhe 3 shtator. Gjatë takimeve me zyrtarë të Departamentit të Shtetit, Departamentit të Drejtësisë dhe Byrosë Federale të Hetimit (FBI) u diskutua mbi rëndësinë e bashkëpunimit të ngushtë mes SPAK dhe agjencive ligjzbatuese amerikane për të goditur organizatat ndërkombëtare kriminale, për të ndaluar trafikun e paligjshëm të lëndëve narkotike dhe pastrimin e parave.
