Drejtuesi i Prokurorisë së Posaçme, Altin Dumani, nisi sot zbatimin e detyrës së marrë nga Komisioneri Publik, që, sipas Kushtetutës, përgjigjet për hetimin e gjyqtarëve dhe prokurorëve në proces vetingu.
Në Kolegjin e Posaçëm të Apelimit (KPA) gjatë ditës u zhvillua seanca gjyqësore publike për çështjen që i përket hetimit të prokurorit Valentin Preçi. Ndaj z. Preçi, si Komisioneri Publik ashtu edhe ONM kanë kërkuar shkarkimin nga detyra me argumentin se nuk justifikon pasurinë. Pas konfirmimit në detyrë në shkallën e parë të vetingut, vendimi për prokurorin u ankimua në KPA.
Kjo ishte seanca e parë e këtij viti për Kolegjin dhe po kështu e para edhe për drejtuesin e SPAK-ut, që udhëheq pjesën e hetimit ndaj subjekteve të drejtësisë.
Në sallën e gjyqit, z. Dumani ndoqi dhe përfaqësoi palën vlerësuese të gjyqtareve dhe prokurorëve, duke kryer me sukses kalimin e butë të drejtimit në një institucion të ri nisur nga detyrat që ka parashikuar Kushtetuta e vendit prej vitit 2016.
Komisioneri Publik pushoi së ekzistuari si institucion dhe detyrën e tij me nisjen e vitit 2025 e mori Prokuroria e Posaçme.
