Kandidatja e PD për bashkinë e Durrësit, Grida Duma, ka qenë e ftuar në emisionin “Opinion”, përballë një paneli gazetarësh.
Duma është përqëndruar në sulme dhe akuza ndaj kryetarit aktual dhe njëherësh kandidati i majtë Dako. Ajo tha se Dako e ka betonizuar qytetin e Durrësit, por nga ana tjetër ajo shprehu gatishmërinë për të vijuar ndërtimet nëse ajo fiton.
Nga ana tjetër, Duma tha se plani i saj është për të rivlerësuar pasuritë arkeologjike dhe do ndërtojë një akuarium të madh në Durrës
“Si ka mundësi që me pasuritë arkeologjike që Durrësi ka, me bregdetin e tij të mrekullueshëm, me begatinë e tokave të veta bujqësore, me traditën shumëvjecare të turizmit, që është në të vërtetë një legjendë e vërtetë kombëtare, Durrësi pra, të rrënkojë dhe të vuajë kësisoj? Pas 15 vitesh, tani është koha të ndryshojmë gjithçka. Si kryetare bashkie do i kthej prestigjin e munguar Durrësit. Ne kemi një plan realist për Durrësin me një vizion afatgjatë.
Do të rivlersojmë pasuritë arkeologjike. Do të ulim taksat bashkiake me 30 %, që të nxisim punën dhe sipërmarrjen. Do të kemi fond për sigurimet e të rinjve të sapunësuar dhe grave në nevojë për paga më të mira.
Do të mirëmbajmë bregun dhe do të pastrojmë detin, do rikthejmë plazhin publik, të hapur dhe gratis për të gjithë. Do të ndërtojmë akuariumin e madh të Durrësit dhe qendrën e madhe artistike polifunksionale. Do të trokas derë më derë në të gjitha institucionet europiane dhe do të sjell grante miliona euro që digjen, nga mungesa e vullnetit dhe ekspertizës, që fatmirësisht unë kam”, – përfundoi Duma.
