Kreu i PBDNJ-së, Vangjel Dule flet nga Dropulli për reformën në dretjësi, të cilën e konsideron një domosdoshmëri strategjike për vendin. Sipas tij, mungesa e kësaj reforme ka sjellë institucione të pakonsoliduara.
“Nuk kemi produkt të reformës në drejtësi. Jeta institucionale e politike e vendit është në ngërç. Vendi nuk qeveriset. Qeveria nuk është e përqendruar tek problemet e qytetarëve por tek opinioni politik i reformës në drejtësi”,- tha ai.
Dule nuk ka nguruar të japë edhe zgjidhjen e tij për ngërçin që ka kapur reformën në drejtësi. “Pas kalimit të paketës ligjore të dekriminalizimit që duhet implemetuar bëhet miratimi i reformës në drejtësi me kusht implementimin nga parlamenti në zgjedhjet e ardhshme, që duhet të jenë të parakohshme. Me mbylljen e paketës së reformës në drejtësi duhet amenduar kodi elektoral dhe parlamenti i ardhshëm që mund të dalë nga zgjedhjet në fund të pranverës, të implemetojë paketën e dekriminalizimit dhe reformën në drejtësi duke shmangur konfliktin për 3/5 e 2/3, duke zhvilluar edhe referendumin”.
Këto deklarata kreu i PBDNJ-së, i bëri në 25-vjetorin e krijimit të OMONIA-s, ku u bë edhe prezantim i dokumentarit “Aty ku zemra jonë rreh” me përmbajtje antishqiptare e me thirrje vorioepiriote. Dokumentari ishte një përmbledhje e rasteve të diskriminimit e dhunimit të minoritetit që prej vitit ‘91 me krijimin e OMONIA-s. Në dokumentar u paraqitën ngjarje të dhunshme, si arrestimi i gazetarëve në periudhën e Berishës 94 – 95, problematikat e Himarës, vrasja e Aristotel Gumës, censurimi i minoritetit gjatë regjistrimit të popullsisë, etj.
BW