Në një pjesë të vogël të një pylli në Neuenkirchen, Gjermani, gjendet një gur që s’bie aq në sy.
Në të nuk ka ndonjë shenjë apo pllakë që tërheq vëmendjen e atyre që kalojnë andej, por duke e parë në foto ju mund ta vëreni se në fund të tij qëndron një prerje, e cila është e mbuluar me blozë të zezë.
Dikush është përpjekur që ta ndez zjarrin afër këtij guri, por pse?
Guri që peshon 1.5 ton është në fakt një vepër arti nga Aram Bartholl. Guri është një gur i vërtetë, mirëpo i modifikuar për të fshehur brenda tij një router të Wi-Fi. Kur guri ngrohet duke ndezur zjarr afër tij tek prerja, ai e konverton nxehtësinë në elektricitet, shkruan Gazeta Express.
Vizitorët që kalojnë aty pranë duhet ta ndezin zjarrin dhe kështu duke e ndezur zjarrin, do të aktivizohet edhe routeri që gjendet brenda në guri.
Sapo të aktivizohet routeri, vizitorët mund të lidhen në internet dhe të shkarkojnë një koleksion udhëzimesh të mbijetesës në versionin PDF, që u ndihmojnë atyre se si të veprojnë në këto anë.
