Profesor Pëllumb Xhufi i ftuar në emisionin Shqip nga Dritan Hila në Dritare TV, thotë se ndryshimet Kushtetuese të vitit 2008 të bëra mes palëve politike PS-PD, duhet të zhbëhen. Zoti Xhufi thotë se ndryshimet kushtetuese, prodhuan një realitet ku në qendër është kryetari jo partia.
“Do të na duhen dekada të tëra për të shëruar të gjitha plagët që ka lënë qeverisja e Berishës. Unë e bëj fajtor jo vetëm për atë çfarë është zoti Berisha dhe se si e bëri opozitën, por ai krijoi një klasë politike sipas shijes së tij.
Çfarë të rejash ka sjellë qeverisja e majtë në Shqipëri? Unë mendoj se po ecën në hapat e tij. Ta nisim nga ekonomia. Janë të njëjtat projektet. Privatizim, që shqip-shqip është vjedhje. Kanë shkuar për skrap uzina të çmuara që edhe sot mund të punonin mjaft mirë. Filloi edhe privatizimi i hidrocentraleve. Dhe mbështetja që i jepet oligarkëve, që nuk është aspak e drejtë.
Por unë mendoj se pa zhbërë ndryshimet kushtetuese të 2008 që sanksionuan ndarjen e pushtetit mes dy forcave politike ose më qartë dy personave nuk do të ketë çlirim të procesit të dinamikës demokratike, kështu do të mbetemi gjithmonë te kryetari”, u shpreh zoti Xhufi.
/f.s
