Aq shpejt sa i thithëm turistët e huaj, po aq shpejt mund t’i humbasim, nëse nuk përmirësojmë cilësinë e shërbimit dhe nuk sigurojmë krahun e punës. Sipas operatorëve turistikë, Shqipëria po kalon fazën e eksplorimit masiv nga të huajt dhe tani kërkohet standard dhe turizëm i qëndrueshëm.
Dalëngadalë Shqipëria po kalon fazën e eksplorimit nga turistët e huaj dhe po hyn në një fazë të re, mjaft të rëndësishme dhe njëkohësisht të vështirë. Atë të turizmit të qëndrueshëm dhe ofrimit të një shërbimi cilësor si në hotele ashtu edhe në bujtina.
Fluksi i turistëve nëse nuk menaxhohet si duhet nga subjektet rrezikojnë që të kthehet në një penalizim, pasi aq shpejt sa tërhoqëm turistë po aq shpejt mund edhe t’i largojmë.
Dhe në fakt këtë problematikë e kanë kuptuar dhe po e vuajnë edhe vetë pronarët e bujtinave, aq të preferuara dhe të kërkuara veçanërisht nga turistët e huaj.
Sezoni verori këtij viti pritet të përcaktojë nëse Shqipëria do të vijojë të tërheqë në mënyrë të qëndrueshme turistë të huaj, apo do të tërheqë kureshtarët që nuk e kanë eksploruar ndonjëherë.
