Izet Haxhia ka kallëzuar penalisht në Porkurorinë e Posaçme (SPAK) drejtorin e Përgjithshëm të Burgjeve, Agim Ismajlin.
Në letrën që do botohet në gazetën DITA bashkë me një reagim të avokatit të tij Idajet Beqiri, Haxhia shkruan se po torturohet në burg.
Ndër të tjera, në letër, ai shkruan se drejtori i Burgjeve, shumë herë ushtron presion psikologjik mbi të, e fut në izolim dhe e keqtrajton.
Haxhia shkruan gjithashtu se ky keqtrajtim po e çon drejt vetëvrasjes.
“Po hakmerret në mënyrë primitive. Në konventën ndërkombëtare të torturës, izolimi cilësohet si tortura më e rëndë. Si pasojë e këtij izolimi, gjendja ime psikologjike po rëndohet përditë e më shumë, gjendje e cila mund të agravojë deri në akte të rënda ndaj shëndetit tim fizik duke dëmtuar vetëveten. Siduket ky është qëllimi i këtij izolimi antinjerëzor dhe anti-ligjor.
Pjesë nga letra e Izetit
Kam kërkuar arsyen e këtij izolimi të paligjshëm dhe më është thënë në mënyrë shkresore se unë qenkam një person i rrezikshëm dhe prandaj mbahem në izolim të egër. Mendoj që ky izolim është anti-njerëzor. Kam kërkuar shumë herë nga autoritetet e burgut që të hiqet izolimi, përgjigjet janë qenë negative. Po më shkatërrojnë fizikisht dhe mendërisht,”– shkruhet ndër të tjera në letrën e Izet Haxhisë.
Izet Haxhia ndodhet në qeli për vrasjen e Azem Hajdarit dhe është dënuar me 25 vite burg për këtë krim. Ai u ekstradua nga Turqia ku qëndronte pre reth 20 vitesh.
Për të njëjtin krim, Jaho Mulosmani është dënuar me burg të përjetshëm.
Të dy kanë dhënë një seri intervistash me video në dy vitet e fundit në DITA mbi vrasjen.
Haxhia këmbëngul se është i pafajshëm dhe pret rigjykimin./ dita/ g.kosovari
