Banorët e fshatit të Rinasit kanë dalë për të katërtën ditë rresht në protestë. Ashtu siç e kishin paralajmëruar ata kanë bllokuar rrugën në afërsi të shkollës.
Pjesë e protestës këtë të enjte ishin bërë edhe fëmijët, të cilët nuk shkojnë në banka prej dy ditësh. Të shoqëruar nga prindërit ata ishin ulur në mes të rrugës.
“Duam shkollë, shkolla rrugë nuk ka”, thërrisnin të vegjlit.
Ndërkohë ditën e sotme protestës i janë bashkuar edhe disa përfaqësues të PD-së, deputetët Dhurata Çupi, Oerd Bylykbashi, Xhelal Mziu etj.
Në orën 18:00 është paralajmëruar një protestë edhe nga banorët e Ahmetaqit.
Banorët kërkojnë nga Autoriteti Rrugor Shqiptar që të rikthejë lëvizjen me 2 sense në rrugën që të çon drejt aeroportit.
/a.r
