I ftuar mbrëmjen e sotme në emisionin “Opinion” në TV Klan, ishte ish-deputeti i Partisë Demokratike Ervin Salianji, i cili këtë javë ka nisur një tur takimesh me bazën e kësaj force politike, duke kërkuar hapjen dhe ripërtëritjen e saj.
I pyetur nga gazetari Blendi Fevziu, Salianji e ka bërë të qartë pakënaqësitë e tij ndaj kryedemokratit Sali Berisha dhe mënyrës se si funksionon partia.
Salianji theksoi se qëllimi i tij është të mundë qeverinë e Edi Ramës dhe të ndihmojë PD-në të rifitojë lidhjen me bazën e saj. Sipas tij problemi kryesor lidhet me vendimmarrjen dhe mungesën e përfshirjes së anëtarësisë.
Ish-deputeti kritikoi mënyrën se si PD po i trajton fitoret e zgjedhjeve dhe përbërjen e listave të kandidatëve. Ai tha se pavarësisht humbjes së thellë, PD ka fituar disa bashki pas shumë vitesh dhe ka arritur të promovojë kandidatë të rinj e me vlera, por nuk po analizon këto suksese në mënyrë të drejtë, duke mos nxjerrë mësime për zgjedhjet e ardhshme.
Pjesë nga biseda në studio:
Salianji: Unë dua të mund Edi Ramën! Dhe këtë a e kam vetëm unë, a e kanë edhe të tjerë, hajde të gjejmë mekanizmin si mundet!
Fevziu: A keni ju një pakënaqësi me Berishën?
Salianji: Unë kam pakënaqësi me gjendjen mo, nuk kam pakënaqësi me emrin.
Fevziu: Ma adreso.
Salianji: Pakënaqësia që kam unë ndaj Partisë Demokratike është që nuk po dëgjon në mënyrën e duhur zërin e anëtarësisë. E para. Dhe e dyta, që është më e rëndësishmja, nuk po i përshtatet nevojave të shoqërisë për ndryshim. Sepse anëtarësia të voton disa, lidershipi zgjedh disa të tjerë. Sepse anëtarësia e PD-së kërkon revoltë, ne bëjmë foltore.
Anëtarësia e PD-së kërkon analizë, ne duam ta bindim që zgjedhjet janë të vjedhura. Nuk ka nevojë për t’u bindur asnjë njeri dhe unë e vë me bast, cilindo të pyesim këtu, se të gjithë që janë këtu janë të bindur që zgjedhjet vidhen, por si do ta zgjidhim ne këtë problem?
Fevziu: Por si zgjidhet kjo? Këtë po të pyes. Kryetari i PD-së është Sali Berisha, dhe e njeh politikën më mirë se kushdo. Ka 35 vjet… Cila është pakënaqësia juaj për Berishën, ma adreso.
Salianji: Unë nuk e kam me asnjë emër.
Fevziu: Natyrisht që e ke se kontestimi me atë vjen.
Salianji: Unë e kam me idetë dhe me vendimmarrjen… Cili është problemi sot me PD-në, ne që mbledhim 500 njerëz me PD-në dhe i takojmë? Apo të tjerët që nuk takojnë asnjë prej 7 muajsh?!
Fevziu: Ajo është gafë, është gabim. Unë kam patur vërejtjet e mia për listën e PD-së, për mungesën e emrave të rinj dhe frymës së re.
Salianji: Ore ne kemi një analizë të humbjes, sepse kemi humbur apo jo?! Por kemi edhe një analizë tjetër që nuk e thotë asnjëri. Pse nuk i analizon PD fitoret? Se do duket habi. PD ka fituar në 6 ose 7 bashki.
Fevziu: Po është e vërtetë.
Salianji: Pse nuk e bën analizën pse ka fituar?! Ne kemi arritur të fitojmë Krujën pas 20 vitesh, ne kemi fituar në Kurbin në këto zgjedhje, kemi arritur të fitojmë në Kavajë, kemi arritur të fitojmë në Mirditë, në Tropojë. Në Pukë, Fushë Arrëz… Pse PD e ka kompleks që të marrë modelet më të mira? Avantazhi kryesor është përfaqësimi, janë kandidatët, pa konsum, pa patur mëkate, kandidatë që janë shtyrë dhe kanë arritur të jenë fitues. Pse nuk e bëjmë këtë? Të marrim modelin e këtyre zonave dhe ta çojmë në zona të tjera.
Sjellim ndërmend se ish-deputeti demokrat Ervin Salianji, anëtari i Këshillit Kombëtar të kësaj force politike, Ilir Alimehmeti, dhe disa nga demokratët më të votuar në zgjedhjet e 11 Majit, janë bashkuar duke nisur një tur takimesh me bazën nëpër qytete, ku bëjnë thirrje për një hapje dhe ripërtëritje të Partisë Demokratike.
Por këto takime duket se nuk janë pritur mirë nga kryedemokrati Sali Berisha, i cili e ka cilësuar turin paralel si axhendë personale. Ai hodhi akuza të drejtpërdrejta kundër këtij grupimi që, sipas tij, nuk bëri fushatë, por zgjodhën të pushojnë. Çdo njëri prej tyre, tha Berisha, do të japë llogari para strukturave. Pavarësisht kësaj, duket se këto takime kanë sjellë jo pak shqetësime, pasi të mërkurën, vëmendjen e mori edhe një mesazh në adresë të demokratëve, ku nënvizohej se “persona të paautorizuar kanë shpërndarë një njoftim për takim me strukturat”.
Ai që në fillim u cilësua nga demokratët si thjesht “lajm portalesh për të sfumuar skandalet e qeverisë”, u konkretizua ndryshe nga vetë Salianji, i cili e tha hapur atë që kërkon nga mbështetësit e kësaj force politike. Sipas Salianjit, PD ka nevojë të hapet dhe të ripërtërihet.
