Kryeministri i Bullgarisë Rumen Radev beri me dije se dy anije u goditë me dronë pranë ujërave të vendit të tij duke shënuar incidentin e dytë të tillë brenda një jave. Radev konfirmoi se një anije mallrash në pronësi të Ukrainës u godit nga tre dronë dhe pak më vonë një tjetër mjet lundrues u godit dhe u fundos. “Ky është një incident krejtësisht i papranueshëm.
Një tjetër sulm ka ndodhur shumë pranë ujërave territoriale të Bullgarisë”- deklaroi kryeministri bullgar. Radev tha se mjeti i parë lundrues, ishte anija e mallrave “Chelsea 3” me flamur të Maltës, ndërsa konfirmoi se të 15 anëtarët e ekuipazhit, 7 ukrainas dhe 8 azerbajxhanas, u shpëtuan. “Na mungojnë prova të forta dhe të qarta për të ngritur akuza kundër ndonjë pale specifike”- deklaroi kryeministri bullgar duke aluduar se pas ngjarjes qëndron Rusia, ndërsa njoftoi gjithashtu se do të thërrasë ambasadorin rus për të diskutuar incidentin.
Sipas autoriteteve bullgare nga anija e dytë “Azov Concord.” 5 marinarë u evakuuan, ndërsa 11 persona nga ekuipazhi i saj rezultojnë deri tani të zhdukur. Ndërkohë, sekretari i përgjithshëm i NATO-s tha se bisedoi me kryeministrin bullgar për sulmet e fundit.
“Aleanca do të vijojë bashkëpunimin e ngushtë me vendet anëtare në rajon. Ne kemi forcuar tashmë praninë mbrojtëse përgjatë krahut lindor dhe do të vazhdojmë të monitorojmë situatën e sigurisë dhe të përshtasim masat parandaluese dhe mbrojtëse sipas nevojës.
Sulmet pranë brigjeve të Bullgarisë u dënuan ashpër nga Brukseli dhe Ukraina, ku kjo e fundit akuzoi drejtpërdrejt Rusinë. “Deti i Zi është kthyer në një tjetër front të përshkallëzimit të luftës së Rusisë ndaj Ukrainës. Ky është një zhvillim i papranueshëm”- tha Presidentja e KE-së Ursula fon der Leyen.
Duke folur me herët nga Vrashava, komandanti suprem i forcave aleate të NATO-s në Evropë, gjenerali amerikan Alexus Grynkewich, paralajmëroi se aleanca do të kundërpërgjigjet ndaj çdo sulmi rus, sipas një strategjie të re të quajtur “Teoria e Fitores”.
