Kordoni i policëve para godinës së kryeministrisë, snajperat mbi ndërtesat pranë bulevardit “Dëshmorët e Kombit” dhe një numër i madh forcash speciale në gadishmëri ishin ajo çfarë u pa sot me sy të lirë gjatë protestës së Partisë Demokratike.
Por të tjera masa ekstra dhe tepër sekrete ishin marrë nga Policia e Shtetit për të shmangur apo identifikuar më lehtë provokatorët e ndonjë incidenti të mundshëm, që në fakt nuk ndodhi.
Burime nga policia pohuan për “BalkanWeb” se një nga masat sekrete që nuk ra në sytë e protestuesve ishin pikërisht kamerat e trupit që efektivët në rreshtin e parë para kryeministrisë i mbajtën ndezur pothuajse gjatë gjithë kohës.
Një tjetër masë ekstra sigurie ishte edhe monitorimi me dron i turmës, që ka siguruar edhe një foto ekskluzive gjatë momentit kur policia po filmonte nga lart protestuesit.
Ndërkohë gazetari i “News24” Artan Hoxha ka raportuar se forcat blu kanë infiltuar mes turmës edhe agjentë të veshur civilë.
“Mes turmës ka patur edhe agjentë të infiltruar për të marrë informacion. Pjesa tjetër u që shfaqën në tarracën e Kuvendit, Kryeministrisë dhe të Rogner-it ka qenë procedurë normale që zhvillohet në çdo rast të tillë”, – tha Hoxha.
