Specialistët e Sektorit për Narkotikët në Drejtorinë e Policisë së Qarkut Kukës, pas një hetimi dy mujor proaktiv, në orët e mbrëmjes, në bashkëpunim me Forcën Operacionale të Drejtorisë së Policisë së Shtetit, kanë finalizuar me sukses operacionin antidrogë të koduar “JUPA 1”.
Si rezultat i këtij operacioni u bë e mundur kapja dhe arrestimi në flagrancë i shtetasve:
Indrit .S. Lala, 22 vjeç , banues në qytetin Krumë të Rrethit Has.
Selanik .P. Hoti , 23 vjeç, banues në qytetin Krumë të Rrethit Has.
Këta shtetas janë kapur në flagrancë ,në rrugën Kukës –Morinë, pasi me automjetin tip Mercedes Benx me targa AA 552 KE, që e drejtonte Indrit Lala transportonin rreth 3 kilogramë lëndë narkotike të dyshuar Mariuanë , të cilët do ta trafikonin për në Kosovë.
Nga tërësia e veprimeve hetimore të kryera nga ana e Specialistëve për Narkotikët në Drejtorinë e Policisë së Qarkut Kukës , në bashkëpunim me Prokurorinë e Rrethit Gjyqësor Kukës, rezulton se këta shtetas kryenin trafikim të lëndëve narkotike në sasi të vogla në drejtim të Kosovës.
Lëndën narkotike e kanë blerë në një qytet të Shqipërisë së Mesme.
Lënda narkotike dhe automjeti u sekuestruan në cilësinë e provës materiale dhe do t’i kalojnë Prokurorisë për veprime të mëtejshme.
